– بسنة 2015، صدرت السلطات السعودية قرار حكومي يمنع بشكل نهائي زراعة كل النباتات اللي تستعمل كعلف للحيوانات (مثل الجت والبرسيم !!) لأنه هاي النباتات تصرف المياه الجوفية مالتهم والسعودية اصلا عدها ازمة بموضوع المياه باعتبارهم منطقة صحراوية، وحسبوا أنه هذا القرار راح يحافظلهم تقريبا على 8 مليارات متر مكعب من هاي المياه (يعني أكثر من الحصة السنوية مال نهر دجلة !!)

 

 

السعودية بيهه 170.000 راس حلال

– طبعا المتضرر الأكبر هوه الناس والشركات الي تربي الحلال (يعني الغنم والأبقار والجاموس وربعهن !!) ووزارة البيئة والمياه والزراعة السعودية سوتلهم حلول بديلة مثل دعم مصانع العلف اللي يسموه “العلف المتكامل” وشجعوا استيراد العلف الأخضر من الخارج بدل زراعته .. وهمه طبعا هم ما راضين وهسه راح تجيكم السالفة.

– مثال عالشركات اللي تأذت من القرار “شركة المراعي”.. هاي الشركة زودت نسبة استيرادها من العلف الأخضر من 52% بسنة 2016 إلى 100% بهاي السنة، وهالشي فرّق عليهم بتكاليف العلف بحوالي 100 مليون دولار بالسنة، وهالشي طبعا ما اقتنعت بيه الشركة وظلت تدور عن حلول بديلة حالها حال باقي الشركات. بالمناسبة أرباح شركة المراعي بسنة 2015 مثلاً وصلت 1 ونص مليار دولار تقريباً.

 

 

– الحل الجديد اللي توجهتله الشركات السعودية المتأثرة بهذا القرار هو أنه تاخذ استثمارات زراعية بغير دول، وتحديدا من الدول اللي بيهه موارد مائية بس ما عدها قوانين صارمة بهالموضوع مثل السودان والأرجنتين ودول أوربا الشرقية .. وحتى أمريكا. فمثلا شركة “المراعي” اشترت بوادي بالو فيردي بولاية كاليفورنيا 14000 دونم (16% من مساحة الوادي !!) كلهه مخصصة لزراعة الأعلاف (اللي هيه أساسا تشرب الماي من الگاع شرب !!).

 

 

مزارع العلف بكاليفورنيا

– شركة المراعي نفسها اشترت بأريزونا گاع مساحتها بحدود 10.000 دونم وخصصتها لزراعة العلف الأخضر .. المفارقة أنه هاي الگاع بيهه 15 بير ماي وحسب ما يكول مراسل NPR بأنه كل بير من هذني الآبار بيه قريب الـ 5 مليون متر مكعب من المياه الجوفية (يعني مجموعهن يعادل مرة ونص من سد اليسو اللي تركيا صارلهه مدري كم سنة تريد تمليه !!).

 

 

مزارع ومخازن العلف بأريزونا

– طبعا الأمريكان ما مرتاحين للموضوع واكو مطالبات ومناشدات من المسؤولين للحكومة الأمريكية بأنه تعدل قوانين ادارة المياه حتى توقف موضوع الاستثمارات الزراعية اللي دخلت عليه غير دول مثل الامارات واليابان. ولحد قبل شهرين صحيفة الگارديان سوت تقرير حجت بيه عن زيادة الأراضي السعودية بأريزونا وشلون انه ديستغلون قانون توفير الماي بشكل رخيص للفلاحين من الحكومة، حتى يزرعون بيه علف أخضر ويدزوه للسعودية.

– ومثل ما سولفنا قبل شويه … السالفة مو بس بأمريكا وانما السعودية توسعت بيهه لهواي دول أفريقية منها مصر والسودان وموزمبيق وأثيوبيا وغانا. وبـ 2019 وصل هذا التوسع للعراق، لأن حسب ما ذكرت وكالة ناس نيوز بأنه السعودية راح تستثمر بحدود “مليونين ونص” دونم من الأراضي العراقية ببادية الأنبار والمثنى الحدوديات ويه السعودية بالزراعة .. هاي المساحة تعادل تقريباً 5% من الأرض الصالحة للزراعة بالعراق.